2011年12月31日 星期六

達仔的告白


今年,我由街貓變家貓,瘦仔變肥仔,病貓變靚貓,都係多得我個靚仔主人咋

佢見我隻耳個傷口好左,比我除大喇叭呀,點知我即刻又抓損左,比佢鬧獲金呀,但佢見無膿,傷口唔大,比我唔戴幾日觀察下喎,好開心呀:)

2011年12月30日 星期五

睇下我條尾

2011年12月28日 星期三

痛呀~

坐大脾就坐大脾,唔好下下出爪好喎,衰仔


2011年12月27日 星期二

咦~有海鮮味呀

去百佳買左幾罐貓罐頭比街貓,而家好少幫趁百佳,去趁都係為左呢隻平野貓罐頭;唔想蝕比百佳心態影響下,攞左佢一個紙皮箱(有問職員架),拎嚟做抓板,再攞佢兩個生果膠袋(載貓C用)。。。

專登揀個海鮮味,等阿達仔開心D呀,睇下佢,八八卦卦


捐入去玩㖭,比你玩一排先做抓板啦咁

2011年12月26日 星期一

黑暗國王子

今日化身黑暗國王子

2011年12月25日 星期日

聖誕奇遇流浪狗

聖誕日,南區影相時,見到佢。。。


開頭無攪佢,驚佢係野狗呀

影到5:00pm左右,有個阿伯出現,見隻狗搖哂尾,原來阿伯係嚟餵佢架


走埋去諗住影下佢,阿伯開口第一句就話:你攞番去養啦,佢好聽話好乖架;我話唔得啦,養唔到呀;阿伯繼續講。。。


阿伯:佢識聽英文架,實係鬼佬移民掉佢出嚟

我:佢識聽乜野英文呀?

阿伯示範:hand hand,隻狗真係伸隻手出嚟。我哇左一聲,無諗過流浪狗識伸手呀!


我:佢瞓邊度架?

阿伯:呢度囉

我:無遮無掩喎,落雨呢?

阿伯:落雨佢都瞓喺度,另一邊有其他狗,佢唔敢過去

我:佢個樣唔開心呀


阿伯:可能等佢主人啦


我:你日日都嚟?

阿伯:係呀,放唔低佢,咁可憐,日日帶飯比佢食囉,而家個樣精神左呀;你睇下有無朋友要,幫下佢啦~(阿伯講到眼濕濕)

我:我試下問人啦
﹣﹣﹣﹣﹣﹣﹣﹣﹣﹣﹣

點解咁多街貓街狗比人遺棄架,比人養開跟住得番自己孤令令,真係好陰公架~

2011年12月24日 星期六

24小時貼身膏藥(下)

達仔鍾意人摸,攬,但係佢唔鍾意抱架喎;有時想抱佢上大脾,佢會即刻跳走

早幾日,多野做,十一點仲寫緊blog,佢企喺度等玩,喵到暈。。。

試下抱上大脾陪下佢,一放佢想跳,我捉住佢係咁掃佢背,佢終於肯坐低,仲一坐愛上。。。

第二朝,我對住電腦做野嘅時候,佢竟然抓我小腿,作勢要上嚟;抱起佢坐低,佢唔跳啦而家,仲好得戚㖭;一坐一粒鐘,達仔,你好重呀


雖然無換褲,呢張第二日架啦,佢衰到企喺我隔離,我話:想上嚟呀?“,佢就擰轉背等我抱啦,上到嚟坐坐下。。。放屁,妖~
跟住瞓埋


又一日啦,呢條睡褲嚟,好薄架咋,隻野間中怕跌就伸爪,想死呀你~
而家日頭做野佢又要瞓大脾,瞓覺又要寃住哂,真係一塊貼身膏藥呀

2011年12月23日 星期五

24小時貼身膏藥(上)

一向嘅觀念都係狗就痴身D,貓就cool D,我諗養達仔之前,我無諗過一隻貓嘅痴人程度,會去到咁。。。

自從比佢上床瞓開始,就發現,佢好鍾意瞓喺你枕頭附近,如果你唔攬下摸下佢,佢會自己走嚟挨住你塊面,甚至不停"lam"你

又因為,試過搭住佢瞓,發現,原來佢夜晚係瞓足8個鐘架,大部份時間,佢會8點幾喵我起身,我唔啋佢,佢會死死氣走出廳等,因為我起身會餵第一餐比佢

試過有一晚,半夜扎醒,發現佢捐落被入面挨住我瞓,果朝,可能被入面黑,我瞓到9:30am,佢又瞓9:30am,即係瞓左9粒鐘

但下晝佢又繼續瞓架喎,加埋瞓足十幾個鐘,唔肥有鬼囉


呢張相係“黑夜黑貓瞓左覺”

2011年12月22日 星期四

福爾摩斯 X 女僕

達仔雙重貓格演繹。。。福爾摩斯 X 女僕

達:你整D乜野上我頭呀?


達:乜日日瞓晏覺都攪住哂架,今次係咪影完有野食先?

2011年12月21日 星期三

聖誕look

大家好,我喺帶大喇叭之前,主人幫我換左新look呀,今次係聖誕ook,係咪好靚仔呢?


提早祝大家聖誕快樂啦:)

2011年12月20日 星期二

期間限定﹣再見女僕look:(

星期一晚,見達仔隻耳又出現一塊乾血塊,估計係達仔又抓個傷口,惟有再次幫佢帶大喇叭,今次一定要帶到完全好番為止。。。

佢都真係算乖,無反抗,輕鬆就帶番啦,佢亦無表現唔高興


同一條繩,點解短左咁多嘅?其實係佢肥左呀

耳仔D毛到而家都仲未生番呀,你要加油呀,衰仔~


星期二晚,即係佢帶左一日,無得比佢抓情況下,傷口明明已經唔明顯,但又流出一滴白色液體(膿),幫佢清洗左兼滴埋消炎藥,希望可以無事啦,唔係就要覆診架啦:(

2011年12月19日 星期一

瞓晏覺

達仔瞓慣街,就算而家變家貓,都瞓得好有驚覺性,一行近就醒,電話門鐘響直頭走人

今日下晝,我坐喺房做野,越坐越凍;見達仔縮下縮下;見佢凍,開左暖爐喺睡房(係呀,自己都無得用呀),佢好快就走上床搵周公,瞓都好甜,影相都唔知,捲埋一團黑咁,瞓得好安心呀~

2011年12月18日 星期日

肥到有董建華頸啦

食食食,剩係識lur野食,唔比就做攔路貓,唔比我行,喵到你暈

但你睇下,肥到有董建華頸啦,有幾肚餓吖你,心照啦,死肥仔~

2011年12月17日 星期六

托手㬹

床尾呢個位有個窗台,我放左個cd架;

呢個窗位每朝有陽光曬入嚟,自從天氣凍,達仔每朝就霸左呢個位嚟曬太陽,因為無手尾,架上放左幾隻madonna CD,而家變左達仔托手㬹嘅工具;佢可以成朝唔郁都係呢個舖屎架

我:達仔,望過嚟影張相啦
達:死開啦~

2011年12月16日 星期五

家賊難防

貓糧本來放喺厨櫃,但上兩星期太忙,於是就咁放喺飯枱,達仔lur野食時會走埋去hi下hi下,未試過亂嚟

早兩日,較清閒,執左裝漫畫嘅藤籃少少空間出嚟,放入三袋貓糧;

噚晚,多野做,篇石澳拖到11:30pm都未寫好,關左門專心寫埋佢,聽到出面sisisasa,都無為意,點知D聲越嚟越勁。。。

出去睇,見佢咬爛個袋食緊貓糧;佢竟然識揭開藤籃蓋,抓爛個袋,呢袋餵街貓架,cheap精;佢有食晚飯架嘛,無理由餓成咁囉~


比我打完屁股,個樣勁無奈~


為防家賊,貓糧入番厨櫃,無得比佢作反呀~

沮喪呀~

今日唔係講達仔。。。

早兩星期自信過大,捉貓媽去絕育,諗住自己攪得掂,借左籠自己嚟捉,結果捉唔到兼比貓媽抓左一野,好毒,會腫架

今日,約左義工阿姐一齊去,點知都係攪唔掂,精過鬼,最後都要試徙手捉,戴哂手套啦今次,點知都比佢抓到手腕(手套包唔到嘅地方),又失敗;阿姐好少失手紀錄,真係陀衰家。。。

下星期再試。。。

阿姐見捉唔到,轉移陣地,嚟左我樓下公園,之前比佢發現左兩隻未絕育嘅貓,我間中有去餵下;第一隻好快就捉到,第二隻入籠嘅係一隻已經剪左耳嘅,放番佢出嚟,跟住見到幾隻貓影喺籠口打探,最終捉唔到。。。

睇下捉到果隻,麻色嘅,頸有花紋,白襪仔,阿姐話似女喎;佢過籠時好驚亂撞,撞損個鼻。。。








條片黑mugmug,主要係想聽佢鬧我呀

2011年12月14日 星期三

噚日嘅對話

噚日,返老家食飯打完邊爐後,我同老媽家姐打三腳麻雀,一路打一路傾下計。。。

我:阿達仔呢,識聽人講野架,識聽錫啖先,行過嚟。。。
媽:上次你話佢識聽去街街嘛
我:係呀,佢好驚架,一講即走人
姐夫睇緊電視搭嗲:多唔多野講架佢?
我:都多架
媽:講乜呢?
我:喵,喵(短),即係要食;喵~,喵~(長)嘅。。。
姐搶答:要玩
媽:玩乜架?
我:摸下佢,同佢按摩,“R”下肚dump囉
姐:係啦,貓好鍾意”R“肚dump



呢個時候,明明食完又走番去再打邊爐嘅老豆發悔氣咁話:你剩係掛住隻貓啦,我夠鍾意按摩咯

dead air~~~~~~~~~~~~~~~~~~~~~~~~~~~~~~~~~~~~~~

家姐細細聲:佢想你幫佢”R“肚dump呀?

2011年12月12日 星期一

哼!想偷食?

去完布袋澳,買左包靚蝦乾比老豆送酒

放喺張凳度,無幾耐,隻衰野嚟啦。。。

達:咩嚟呢?咁香嘅


達:好似好好味咁喎


達:出爪先


想偷野食,比我鬧到佢頭dup dup呀;最後心軟,浸左一隻比佢食,佢食左1/3隻就唔食,正衰公

2011年12月11日 星期日

點解貓抓板會爛成咁?

謎底解開


正死仔包

2011年12月10日 星期六

歡樂滿東華

又有好消息啦,達仔啱啱“go屙一篤”,善長人翁意粉送上貓糧一堆,真係好大堆呀~


阿粉,代達仔同街貓多謝您

2011年12月8日 星期四

精到死,一開暖爐就霸頭位

2011年12月7日 星期三

自製貓抓板

兩日前嘅真實對話。。。

朋友:你又話去百佳買野嘅?
我:買咩野呀?
朋友:你話食完飯去百佳架
我:哦!我去執紙皮

朋友:哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣

朋友送嚟嘅貓抓板已經散散地,於是自己郁手

材料:瓦通紙一塊,白膠漿


先將瓦通紙切成1cm闊嘅紙條,塗抹白膠漿


貼呀貼呀


乾透就可以比達仔玩啦


點知


































兩日後。。。。衰仔,使唔使咁重手呀~

2011年12月6日 星期二

C帝的煩惱

達仔做左三料C帝(即係一日C三野),令我最煩惱嘅係。。。好臭

有乜辧法呢?


換貓砂,由無味吸味苿莉都仲係臭;

試用滴露空氣噴劑,消到毒但依舊臭;試過幫佢清完C,本來自己想去都臭到頂唔住,攪到自己忍屎忍尿;陰公

救星嚟啦~惠康7:00pm減價時段,放左香必飄出嚟,原價$3X,特價$19.9;寫到明去除寵物臭味呀,即買~~~~



好OK呀,即刻唔臭,索多兩啖都唔怕啦;香味仲唔濃,唔會好女人,啱哂呀


第二日落去惠康睇下仲有無特價先,本來有十幾枝架,結果。。。。比人搶哂啦~

C帝

C帝。。。當然係達仔啦

呢隻野,最近好明顯肥左;

其實從佢第一日嚟我屋企,醫生話比長糧開始,比朋友/貓義工話我餵得太多,我就開始減佢糧,由以前一日三碗,cut到而家約一日碗半;

每朝先比半碗,跟住隔兩粒鐘左右比二至三十粒,晚餐比三分一碗左右;但係呢隻野成日攞食,唔比就纏你腳,擺出一副可憐相,你心軟怕煩就輸,但即使cut佢糧,佢依然肥左一個碼呀~

而cut左糧,屎屙少左,無咁大舊冇咁臭之餘,貓砂都用得耐D呀,而家果缸砂用左七日啦,仲可以用,真係慳番D呀

佢可能真係識聽,同打過真係乖左???呢兩日佢竟然識抓砂冚屎;我今日打開蓋,見有砂輕蓋住兩舊屎,以為係咁多,一挖,竟然暗藏3舊呀,全部都係兩寸左右,雖然都係多,但已經比以前少左D架啦

睇下相,我今晚唔肯再餵,佢竟然帶我去放貓糧嘅地方,不停hi嚟hi去,用身體語言話我知佢要食呀,幾樣衰~

2011年12月4日 星期日

怒打達貴人

上星期,幫達仔除左個大喇叭之後,佢變得非常活躍,走嚟走去,跳上又跳落。。。

夜晚仲喺我房個衣櫃隔離D櫃"gap"度玩跳高。。。

瞓上床摸下佢,佢又咬我。。。

第二晚,想幫佢剪指甲但佢醒到走左去,跟住幫佢按摩之際,佢一野抓埋嚟,攪到我見血,你未死過呀))))))

即刻攞起枝本來係玩具嘅膠貓棒當滕條一野打佢個pat,佢走去房床尾,再打,佢走番出廳,打,現走去厨所,佢fea我,未死過,大力D,再打;

終於,達貴人走左去"景祺閣",即係冷宮,亦即係佢個貓廁,靜思己過,佢成個鐘唔敢出嚟;我走去睇下,原來佢坐住D黃金呀~

果晚,佢被罰無野食,無得入房上床瞓,睇你知唔知驚

貓真係唔蹤得架,而家,佢咪乖乖地囉,比你任摸,比你滴耳藥水,每次滴完或者佢乖我都會比佢鍾意果隻貓餅乾佢食;我唔會比佢做港童架~

達仔喺冷宮出番嚟,嗚我比野佢食而我唔比嘅表情

2011年12月1日 星期四

脫下大喇叭

手術後,一路帶住大喇叭,見佢傷口比預期好,除罩等佢鬆鬆兼等佢自己清潔下身體。。。

一路“目及”住佢,驚佢會R損番個傷口,佢R得好起勁,結果,R損左塊面少少㖭,但耳仔反而清潔得好好;

見傷口好細,已經埋哂口,觀察左成晚,佢無再R耳仔,暫時唔帶番個大喇叭啦;

睇下,靚仔哂