輕便裝

學下人先。。。內有不雅相，好此道者，快D拉到最低慢慢觀賞...

達：你隊袋咩野埋嚟？


達：咁臭嘅？



達：拎開，拎開啦


呢隻衰仔，D便便臭過乜，之前條腸未好番加食醫生糧，D便便長7"，仲要係粗身果隻，試過無開抽氣扇，未入門口走廊都聞到臭味，你話幾咁難堪；而家無食醫生糧，D屎正常番D，都有4"-5"一舊（都真係唔知咩野貓嚟架），同埋佢係事前抓沙架咋，所以舊野就舖左喺沙面，唉！

下面係正相

。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
。
得番5"長，尾段幼左，即係屙少左架啦，算係輕便裝，但睇下，次次都屙呢個位，又痴哂缸啦，又要我抺啦，正衰仔～


歡迎攞嚟做wallpaper，印落杯，T恤，自便：）

達貴人

大家好，我係達貴“忍”呀，meow～，我星期六做完手術，臥病在床，由朝瞓到晚，唔想郁呀，剩係間中出去搵野食同便一野咋，你知啦，我平日一日點會便一野咁少，一日三野架嘛，不過食得少，便少D都係正常嘅，meow~

把聲拆哂呀，主子打過比醫生，佢話同麻醉時插喉有關，過幾日就會好番架啦

隻耳仔呢，今日無膿流出嚟啦，傷口乾爽，但係之前有D膿乾左嘅焦痴住耳仔，但醫生話唔好夾硬撕，由得佢喎，傷口好番先清理呀

好啦，我要瞓啦，你地跪安啦，meow~

手術後

噚晚，11:30pm過後斷水斷糧；但比佢入房瞓，呢隻野真係幾乖，除左一開始係都要痴住我塊面瞓，其餘時間瞓喺隔離無騷擾我。。。

8:50AM,捉佢入貓袋，發哂爛渣唔肯入，仲比佢個大喇叭刮到我星期四去捉貓媽時比貓媽抓到嘅傷口（各位，捉貓媽行動係失敗左嘅），我鬧阿達仔：走呀，唔聽話吖，唔要你；佢知我嬲，即刻唔敢反抗入袋，hehe~

一去到就有車，仲即開車，我9:30am就去到診所，但我約10:00am，未開門喎



10:00am，放低達仔，佢話4:00pm可以接番佢，咁就返屋企開工啦喂～

11:30am,診所打嚟話手術順利，可以兩點去接佢；吓？兩點？我同佢講要做野，照舊4:00pm去接啦

4:15pm，到診所，醫生遞上樽仔，入面有兩粒大，四粒細肉瘤，擋哂耳道口，之前一定係好辛苦啦；兩日總數$2100


5:15pm，接左唔係好郁嘅達仔返屋企，一返嚟，佢好似唔認得我咁，行嚟行去，仆仆下果隻，又會腳發軟跣左喺度，陰公

6:00pm，跟指示餵佢飲水，佢無嘔，但有打“eat";半個鐘後，餵少量糧佢食，佢即食，但又打"eat"，今晚食住少少先啦～

8:30pm，終於識嚟叫我，原來把聲沙哂，問朋友，佢話因為麻醉時插過喉喎

9:00pm，佢又上奇我張床，醫生話佢今日體溫會降低，比你瞓啦



9:10pm，影佢相，比人剃眼眉，剷左青，好型



耳仔入面個傷口唔係好大，好彩～

達仔明天做手術

（今日兩台同步）

達仔隻耳仔無起色，仲係流住水，決定睇多一個醫生。。。

問左幾個朋友，決定搵www介紹果個醫生，地址係太子，打電話去約左5:30pm

今日買左貓袋，4:30pm出門口，同達仔講帶佢去睇醫生，呢隻野真係識聽架，即刻走開兼lay埋，幾經辛苦至捉到佢入袋，好彩之後佢無呱呱叫，順利搭到紅van過太子。。。

去到見到醫生，佢話要做手術，手術不大，但要星期六先有期做，明早10:00am再帶佢嚟

另外，呢隻野又肥左，去到4.4kg，達標啦，要開始keep住呢個體重

返嚟沿路佢都好定，番到屋企，放個袋落地，佢郁都唔敢郁呀


拉開拉鍊，佢望住我，連頭都唔敢伸出嚟


隔左一分鐘，終於伸個頭出嚟八下，但個樣驚驚青青


食左少少野，明顯唔開心，又上左我張床瞓覺；唉！睇住你聽日做手術份上，比你瞓一陣啦！





12:00後斷水斷糧，為明天手術做好準備；手術後，就係一隻健康貓貓啦～

覇地頭

平時我係閂埋睡房門，睡房係達仔禁地。。。

今晚成晚做野佢都無嚟攪攪震，原來我無閂睡房，入房見到佢，個樣得得戚戚咁瞓喺我張被上面，叫都唔走，仲搖尾㖭，激氣～

足球小將

修甲中

貓草

貓間中會食草，之前亦見過達仔喺山頭食草；

所以呢，當老媽話佢有小麥問我要唔要時，我當然話要啦；

好易種，兩日就出哂芽，一星期就幾寸長啦

剪出嚟比達仔食。。。。唔吼

成棵擺喺佢面前，佢都完全無反應呀，咁多草，叫我點算（我種左5盆呀）

臭呀～

犯左個大錯。。。

今朝起身，發現廁所門關左，貓廁都响入面，即係過去八小時達仔都無得入貓廁，見佢無事走埋嚟搵食，以為無事，直至。。。

突然醒起朋友送來一隻貓玩具老鼠比達仔，於是我同佢講：喂，過嚟呀，比野你玩呀～

出到廳，伸手入我袋，濕嘅，郁下個袋，好臭，揭開睇下，一條長7"嘅便便加一篤尿浸住我個袋，今朝洗袋洗地，好忙呀

我梗係要教訓下隻衰仔啦，叫佢以後唔比喺我個袋屙屎呀

佢知比人鬧，頭䇯䇯咁，唔敢嚟搵我呀

洗完隻老鼠比佢玩，佢唔玩；其實呢隻野好似無乜好奇心，波又唔玩，剩係玩抓板，慳番，唔使買玩具比你

魚翅中，勿打擾

打開個蓋都走去屙，仲唔比我影到你，呵呵呵；達仔個樣好無奈呀～

熟睡

每日下晝開始，佢就無咁痴我，走去瞓覺；

我睇萬凰之王嘅時間，即係8:30-9:30，無論胡杏兒幾咁嘈幾咁歇斯底里，佢都瞓到好似隻豬咁。。。



但係11:00pm過後，佢就煩過乜，跟出跟入，要你陪佢玩，越夜越精神；大佬，我要瞓架～

抓板

朋友親手做嘅抓板係達仔嘅玩具；佢好叻呀，剩抓塊板，無抓過我D梳化傢俬；
雖然已經整左塊新嘅比佢，但佢都堅持玩塊舊嘅，玩到爛開兩邊都繼續，無佢乎～


近期，工作好忙，加埋照顧呢隻衰野，間屋更亂啦～

分途廣播。。。達仔飲水

獨家首播呀，達仔飲水片段。。。

達仔做街貓時腸塞，醫生話佢亂食野之餘，曾經問過佢係咪唔飲水，當時佢飲幾多水真係唔知，而家嚟左我屋企，主糧係乾糧餅乾，佢的確飲好多；

早兩日覆診醫生話正常要飲約兩枝益力多咁多嘅水，至少都要一枝，但好貓都做唔到；我話：達仔每日都一定有兩枝益力多以上喎，醫生隨即摸住達仔話：咁叻仔呀：）

今晚，佢突然入厨房跳上厨櫃（平時佢唔敢），我喝番落嚟，原來佢去飲水；再睇番佢個碗，原來飲到乾哂；噢，怪錯達仔亂上厨櫃㖭～

即刻裝番滿佢個碗，你睇佢飲得幾開心：）

我家的女僕

星期二，帶達仔覆診。。。


首先睇條腸啦，醫生話佢條腸出奇意料地康復得好好，腸入面已經無乾涸嘅宿便，帶去比醫生檢查嘅大便亦正常；體重亦上升至4.1kg，醫生話可以開始減醫生糧（好呀，醫生糧好貴呀），減食糧免太肥（好呀，食少D慳番D呀），理想體重係4.5kg。

從牙仔去估，達仔應該4-5歲，唔算係老貓。。。

醫好條腸，就醫隻耳啦（係呀，佢真係病貓嚟架）；做街貓時已發覺佢隻耳發炎，流血水，當時我用消毒藥水幫佢清潔；到上次睇醫生時，醫生話佢有粒肉瘤，唔影響生命，醫條腸先；但每日佢都抓損個傷口發炎，兼每日都有血滴落地，今日再去醫埋佢。。。


醫生一路用棉花棒清潔，一路解釋（好勁囉，到我幫佢清實比佢走左去）暫時可以做嘅係唔好比佢再抓損，所以佢要戴上大喇叭啦，只要唔再損，個瘤再慢慢處理，因為佢唔贊成做手術，只要個瘤唔再增大，可以暫時不理

醫生話：呢兩星期，你要扮太空貓啦
我話：似女僕多D喎（哎呀，比人知我係宅男㖭）

一番到屋企，開籠，達仔驚啦，想標入梳化底，點知帶左大喇叭，捐唔入，我抱佢番貓屋等佢定番心情先啦，個樣好可憐喔～



但係醫好隻耳，就唔使做病貓啦～

安樂蝸

夜晚天氣轉涼，驚達仔冷親，行下寵物店買張貓床；知道貓鍾意捐窿，想搵個有蓋嘅；其中一間有張個形幾好，但個花好師奶呀，仲要$260㖭～



上網睇，見到有張啱心水，黑灰豹紋架，仲只需$88，點知打去又無貨：（

西環勝在多寵物店，落街再搵，終於見到呢張迷彩嘅，＄88，手工就差D，個係我相信達仔會鍾意囉～
一放底，佢自動波入去瞓，真係好鬼醒架啫～


你睇佢幾舒服，真開心