救命呀，好多老鼠呀

fashion icon-第八集。。。域拖呢吖私刮

又到最受歡迎嘅泳裝環節，達達豬著上‘域拖呢吖私刮“，婀娜多姿

抓板的壽命

上星期。。。

達：好野，明仔親手整左塊抓板比我呀，我今次會錫住佢，慢慢玩架啦



幾日後。。。
我：你又話錫住佢嘅，你呃人
達：好玩呀，老豆姓乜都唔記得呀



我：罰你聽日做(口靚）模

改善生活質素2？

見達仔逐漸康復，上星期一下晝（20號），餵左兩隻蝦仔，係睇醫生後第一次，當日佢有三次大便，一次在食蝦仔後，共11.5"

但第二日全日屙得一次，得2.5"；但心諗，噚日屙得咁勁，今日少D都正常啫

星期三屙左6"，以為正常返

星期四朝，繼續有5"，見樓下竉物店有applaws賣，各路貓痴極力推介呢隻罐頭，覺得達仔要食多D濕糧喎，買罐比達仔食啦，人地推介南瓜雞，但達仔麻麻地雞，買罐吞拿魚蝦佢嘆


比四份一罐佢，食得好開心，食後當晚屙左3.5"


星期五朝，比多四份一罐佢食，點知。。。。全日無貨出

星期六，我出左街，夜晚9:00返，繼續無野出，我又驚啦；幫佢按摩，自己走去屙引佢屙（低能都要做），結果，佢10:00pm一舖過7.5“

星期日，又無貨出

星期一朝，食完早餐，屙左5"

我諗呢，佢都係唔食得蝦仔架啦，一食，D便便就亂哂；本來想改善佢嘅生活質素，暫時你都係繼續醫生糧吧啦

改善生活質素

呢架水機，由我決定收養達仔果陣時，朋友送嘅

話活水D貓貓會鍾意飲，咁就令佢地飲多D水，健康D咁話

但我見達仔都肯去水dou飲水，兼其實我最怕“砌”電器，曾經燒過fuse，成部機燒左，電腦底板又燒過，所以我好憎買D唔係插插蘇即用嘅電器

舊年開過，砌唔掂，入返盒；送比我嘅朋友話，你唔要就幫我砌好影張相啦，我義賣左佢幫其他貓。。。影無問題，砌就。。。我一砌就發脾四啦，好複雜呀（我個standard)

終於呢次達仔又出事，諗返起呢盒擺左喺飯枱腳大半年嘅水機；call識砌機嘅朋友嚟幫手，終於攪掂

頭幾日達仔完全唔理佢


近日終於肯去飲，但我唔覺佢有飲多囉其實

扭計，要抱抱

喂！我唔使做野啦



報寸時間：星期三有6"

fashion icon-第七集。。。織髮代言人

烏黑亮麗達達仔呀～

家姐阿妹嘅唔知家姐定阿妹

呢隻貓貓好耐無見啦，佢同阿cat嘅家姐阿妹同一胎架，家姐係一號，阿妹係三號，呢隻當時叫二號。。。

二號而家叫做“阿B”，佢主人超忙，好彩主力係佢阿媽照顧佢，伯母好錫佢架


佢同隻舊貓相處愉快，聽聞仲教壞隻大嘅，一齊跳上櫃頂；又聽聞佢非常大食又肥，個身同舊貓一樣大，但個頭細人一半喎

問佢主人攞近照，等足幾個月，終於send來五張，但得上面張見到樣，其餘都係鬆嘅，攝影技術真真超班呀




同場加影：報寸時間，達仔過去24小時痾左11寸，睇嚟要減下貓糧先得啦，咁多嘅～

fashion icon-復出第六集。。。阿里巴巴

遙控座

遙控座都要我做埋呀？

R格肋底

先報數：早晚各四寸，感恩

對達仔好D，晚晚幫佢按摩肚仔，希望”腸仔“郁得更暢順，排清便便

佢最喜歡摸額頭，下巴，心口；肚仔就睇心情，但呢期唔理啦，盡量都幫佢按幾分鐘，順便摸下條腸有無硬便喺入面。。。

咁呢，原來有個位佢都好鍾意人摸架喎，睇相。。。



摸佢心口時，佢會自動遞起隻手要你按格肋底，好冧咁架喎～其他貓係咪咁架呢？

好攰呀

達：知你見到我屙屎就開心，今日用盡力，屙左條6寸，好攰呀

老師的及時祝福

星期四上午9:00，達仔便了一條三寸後，至到星期五下晝都無貨

其他貓就好正常，但達仔食fibre醫生糧兼軟便藥就令我擔心

四點落樓開信箱，見到老師日本旅行都為達仔寄嚟祝福，感動呀，但繼續擔心囉


結果五點幾，達仔猛chur野食，我驚餵得多越塞越嚴重，最後餵左少量，佢食完乖乖便左一野，雖然得兩寸，但已令我鬆一口氣

多謝老師～

喂！做乜呀？

更痴身

大病一場後，而家更痴身了



我覺得佢係有模仿我嘅習性架，我瞓覺佢會瞓覺，另外近兩個月，最特別嘅係我去大時，會將佢個廁所移出走廊，我關門去啦，有七成機會會聽到佢入左廁所挖沙架，即係屙左。。。
早排，佢腸塞去唔到，我都專登用呢招，入廁所坐下博佢屙，但唔成功

但今朝，又成功啦，佢屙左兩大條，而我呢，都好暢順，多謝

我的亮麗功課

呢一篇有便便相，怕核突就唔好睇啦。。。

大家，我今日係咪好英呀？


今朝起身，餵佢食左七筒醫生糧，好成功



無幾耐，見佢走入廁所，屙左一條六寸長嘅便，隔住膠袋襟過，軟嘅，放心哂



下晝我出左街

晚上八時返來，喺無準備下打開廁所，竟然又有一條6寸加一條一寸，其實食得唔算多，隻糧可能專for屙屎用，好勁～


截至10:00，食野扭哂計，分兩次餵加埋都係得四筒，今晚會試下迫佢食多兩筒

便便紀錄

達仔嘅便便紀錄。。。

星期三灌完腸後，晚上有漏屎，佢自己入廁所便左兩次，每次少少，醬嚟嘅，當然啦，條腸仲有好多水

星期四，仍然有漏屎，我下晝出去見客，返嚟見廁所有舊成形，手指公大細嘅屎，我當時懷疑係“舊”屎，因為醫生話好入嘅洗唔哂架；兼星期三晚其實食好少好少野，照計無新屎囉；但有屎即係條腸識郁，好事嚟嘅
今日佢食野食得好差，夜晚餵埋軟便藥，有D唔安樂

星期五，朝早迫佢食左三筒（針筒）嘅醫生濕糧，夜晚請教其他人，摸到技巧，餵左五筒；但今日無屙屎

星期六，朝早再餵左五筒（熟手哂），跟住我出去影相鬆一陣，晚上返來，廁所除左有大篤尿砂外，亦有一粒成形嘅手指公屎，近睇過，外表濕潤，但有D擔心係食左軟便藥都唔係軟屎嘅？唔通隻醫生糧唔駛令佢屙軟屎嘅？朋友問我D屎硬唔硬，我又真係大意，理應隔住膠袋襟襟佢，而家沖左，無答案㖭～
但係呢舊肯定係新屎啦，達仔條腸識郁啦～
夜晚餵足七筒，希望佢明天交出亮麗功課

達仔話：你咁鍾意屎，屙比你啦～

達仔有野講

今日，達仔正常番哂，無漏C，但好痴人；

最大問題係唔肯食醫生糧，聽阿cat教搵毛巾包住佢再餵佢食，今朝餵到兩筒，下晝再餵到一筒

始終唔夠架，晚上打去比姐夫個妹求教，佢話包毛巾係啱嘅，另外發現醫生比我嘅針筒個口太大，難吸糧兼難隊入口，教我搵枝新嘅整個適中大細嘅筒口；終於今晚做得好好，用毛巾包到實一實無得走，連餵左5筒，收工

可能噚日食得少，今日無屎屙，要觀望，但精神好好，應該無乜大問題嘅

達仔有野同大家講：先多謝阿cat，唔係我實餓C；
我一定會好返，大家請放心，因為我仲要做fashion icon架：）

周紳士

達仔通完櫃返嚟，雖然迷迷矇矇，但仲識入佢個廁所便便，但。。。

便便係爛嘅（醫生話呢排果D一定係軟，因為一來灌過水，二來要佢食醫生開嘅濕糧加軟便藥水，因為等佢易D屙），

但佢竟然唔識出返嚟，個身“hi"哂屎咁先出返嚟，即刻抺身，抺地抆屎，抆四次張廁紙都係污糟嘅，終於噚日用左一卷廁紙

又，夜晚瞓覺，佢又要上床瞓，唯有舖張大毛巾先啦，見佢好快瞓左，；

但半夜，佢好精神咁用脷同自己沖涼，我估計係麻醉藥效過左，佢識得清潔下身體，之後feel到佢挨過嚟瞓

今朝7:30，比佢嘈醒，聞到有臭味，開頭以為臭味來源係佢，點知一睇自己手臂，哇，有屎呀，再睇自已件tee，哇，又有屎，除都除唔切。。。

今朝，佢問攞野食，嘗試餵佢食醫生濕糧，唔肯食，到下晝我開完會返嚟，我諗住佢實肚餓會食D啦，無食過

醫生比定針筒，用嚟餵佢食，攪到打扙咁，都唔食

打比醫生，佢話一定要迫佢食，唔可以乾糧，結果，要打佢幾野先肯坐定定唔走，但只係食左兩個針筒，好攰。。。

係咪以後都要咁餵達仔？

今晚照片，精神好番，但食得好少野，聽日都唔知有無屎屙呀又

達仔腸塞了

今早打去診所約見醫生，竟然放假了，但有另一位醫生應診，唔想達仔辛苦谷多日，照睇啦，約左三點

診所喺深水埗，早到左15分鐘，去到時午飯未開門，望下達仔，喺個袋度驚到震哂（上次都無咁驚，越嚟越細膽），兼伸哂脷，可能困喺袋真係太熱，唯有搵間有冷氣茶餐廳坐到夠鐘

見醫生，照X光，D屎塞到呢。。。。總括醫生嘅對話，問題在於唔可以亂轉糧，兼食得太多，轉天然糧本來係為佢健康，點知因為wheat太多，可能飲唔夠水，達仔條腸唔夠力推硬便出嚟，另外，達仔盆骨偏細都係屙唔出嘅原因


咁唯有通便啦，叫我兩個半鐘頭後嚟接番佢，唯有喺旺角亂行。。。

六點，返去接達仔，睇通便後嘅X光片。。。通哂


再講下耳仔，上次手術切瘤後，近月耳仔又有膿流出，清潔完隔幾日又有，問醫生，佢檢查後話耳仔又有一粒瘤生左出嚟，不過佢建議先用藥膏及日日幫佢清潔，唔好下下做手術，因為切左都可能會繼續生，唯有暫時先用藥啦

返到屋企，通完櫃後麻醉藥未過，唔認得我，喺屋企亂行，但腳又無力，行兩步就跌，好慘慘


手術醫藥連貓糧盛惠$2960，達仔，好彩我呢期多job咋，唔係點頂呀～

耳同腸都係長期鬥爭，達仔，你要乖乖比心機鬥贏佢呀～

擔心

達仔已經幾日無便便，初時唔為意，以為佢唔鍾意隻新貓砂；

今日專登買番舊貓砂，專登打開蓋睇佢痾，見佢擺哂舖屎，但無貨出

又見佢跳上厨房，搵盆栽D草食。。。糟糕，舊病復發

呢個現象同佢之前做街貓時一樣，諗住打去診所約明天醫生，點知啱啱過左辦公時間，聽朝再打啦

唔怪得之噚日唔好老脾抓我啦，唔舒服呀，怪錯達仔啦。。。

睇下佢今晚個樣，精靈架，有食野有飲水，係無屎痾囉


成晚痴住我，擔心呀～

今晚留番時間陪達仔，兩台同步啦