腸粉

天氣回暖，上星期起我終於唔冚羽絨啦，轉冚毛巾

自從舖蓆後，達仔唔瞓床瞓床頭櫃，但舖張毛巾比佢呢，佢就瞓番床

一人一條毛巾，本來相安無事

但噚日洗毛巾，摷下衣櫃，得番一條，咁噚晚咪我冚囉，隻衰野走過嚟要一齊瞓，們可能呢條毛巾粗，佢拎嚟又咬又抓，怕左佢，比哂你啦

第二日下晝，自動波上番床玩毛巾，玩到變左腸粉


達：好C服呀～


達：洗毛巾唔使落柔順劑架啦，粗粗地好玩D呀

新地盆

呢個袋係我呢期幫個客出去做window display用嘅，番屋企隨手掉喺地


沖完涼諗住執起佢，哇，咁重嘅？原來達仔捐左入去


趕都唔走喎，拉埋拉鍊都唔反抗喎，喺入面好開心咁喎；呢舖真係black on black喎


咁就唔收起佢啦，而家佢日日都要痴住個袋，個袋係達仔架啦

習性第二篇。。。喜悅的C篇

達仔因為曾經腸塞，所以我好緊張佢痾屎

近兩月為左佢好，轉左天然糧，天然糧當然無咁好食啦，咁我就溝番D舊糧，但慢慢減份量啦

但佢食舊糧時D屎係較硬花生屎，溝左天然糧可能腸胃未慣，D屎較軟，佢又唔肯抓沙冚屎，好臭

今個星期，嘗試比全天然糧，見佢食剩好多，但最大問題係佢近兩日無痾屎，聽聞天然糧吸收多D，所以會痾少D，但兩日唔痾，我又擔心喎

於是又溝番少少舊糧比佢，佢又食得好雀躍，終於噚晚（足48小時）痾啦，癮左兩條手指公，較硬，仲冚埋沙，good boy，放心哂～

今朝，佢又再入去，再痾4條，睇嚟都仲要溝D舊糧比佢安心D


行開啦，痾完屎咪跳上我度啦～

習性﹣睡眠時間

第一次養貓，同達仔“同居”左8個月，發現佢習性有D轉變

今日先講睡眠時間。。。

以前聽朋友講，貓係日頭瞓覺，夜晚活動嘅動物

又聽朋友講，佢隻貓鍾意半夜就嚟敲門，行出又行入，攪到佢無得瞓

達仔啱啱嚟果陣我大概12:00關燈瞓覺，佢就夜晚1:00am最活躍，果陣我關門瞓，聽到佢喺廳亂走亂撞玩捉老鼠

而家我精呀，11:00am就熄哂廳燈，佢就提早玩捉考鼠

我12:00瞓，佢就跟我12:00瞓，瞓床隔離個床頭櫃面，要瞓喺我隔離

朝早呢，就大概7：00-9:00起身；（係呀，佢真係好浮動架，試過我9:45am起身，佢仲依然瞓到豬咁）

佢真係瞓足架喎，半夜見佢瞓到好熟架喎，成晚無郁過，都係瞓同一個位

佢瞓覺時間同我一樣，無攪攪震，我覺得佢呢樣野好乖仔

當然，佢日頭都會瞓下，但就無瞓咁耐囉

ps:有養貓嘅，你地D貓幾時瞓架？瞓幾耐架？

打拍子

諗住拍佢close-up嘅表情，點知。。。

係鍾意整污糟佢呀，吹呀～

喂，衰仔，D衫洗乾淨架，唔好坐落去啦


仲要扮唔識聽喎，擺個舒服樣㖭喎


睇下，又擺個惡樣出嚟啦，正衰仔，寵壞啦而家

你病呀？

噚日開始病病地，今日睇左醫生，番嚟瞓左一覺，hea做左一陣野。。。

醒起之前買左格仔架都未痴，一於痴左睡房先，今晚可以開大D個窗啦

你唔病咩？整乜呀？同我玩呀，同我玩呀，同我玩呀，同我玩呀


死仔，唔係你，我使攪咁多野，仲要嘈嘈嘈，信唔信我唔同你倒屎吖啦～

玩樂時間

你地今日損左未？

養貓就真係要預左對腳會多幾條疤

達仔越嚟越黐身，你坐埋電腦做野，一係佢就坐喺地下我個背囊上面，如果果日出街出得耐，佢就一定要跳上大脾，好似話你聽唔比再走開咁

但係，佢肥左又論盡左，佢喺大脾間中又要轉舖屎，今次一轉就"hi"野啦，佢PK，但係更PK嘅係佢跌時伸爪想抓住D野，但果隻係我隻腳嚟架，結果咪損囉。。。

不過都無鬧佢，知佢今次無意，佢平時已經收哂爪，我又強迫性剪佢腳甲，但剪左都係損，唉～

你地今日損左未？

與達仔結緣

呢篇係舊文，但我諗放番過嚟會統一D，未睇過嘅就當新野睇啦，睇下我同達仔（當時叫黑仔）嘅緣份
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣

又要感性下講下故仔；繼續果竇貓，除左兩隻貓媽，阿女同阿B，仲有一隻剪左耳(即係閹左）嘅貓公


全身黑色，開頭見佢永遠眼超超，但對眼碧綠色，好靚，毛色有光澤(有原因，睇下文）


之後每次去，都會帶貓餅乾或礶頭，佢就開始認得我，而家我人未到，嗌兩聲佢就會飛奔出嚟等我
最近影嘅相明顯見佢眼神唔同左，溫柔左，應該係開始信我啦
而家，食完野佢要“戀”你腳，要你陪佢玩，R背脊，掃佢個頭，仲會開心到喵喵叫，好似同你傾計咁


佢絕頂聰明，食野時，如果同其他貓share一碟，佢識得撥埋個碟近自己；另外，唔係每次去都見到佢，咁佢去左邊呢？結果，一次貓媽同佢失踪，我試下行第二條路去另一個有貓嘅花園，路程要10分鐘，結果，見佢坐左喺度等餵貓阿姐餵佢，即係話佢識跨區搵食
喺果邊即刻唔識我，痴住餵貓阿姐，佢喺呢邊有第二個名。。。烏卒卒
（呢張相當時影架，即刻唔識我，正衰仔）


阿姐餵嘅全部靚野，唔怪之得隻衰野毛色咁靚啦；
佢隻右耳有D疑似爛肉(可能打交），餵貓阿姐比左樽消毒藥水叫我試下幫佢抺，呢隻野除左開頭扭下計之外，竟然乖乖比我清理佢隻耳仔，真係好乖囉，我估以前應該有人養開架

另外，update下貓媽消息。。。

貓媽呢兩日唔見左，我估係“lay"埋生仔啦，已同餵貓阿姐聯絡，知道之後點做，會等佢生完斷左奶先捉佢去閹，應該會係7月中至尾嘅事。。。

可愛D

比朋友投訴，話我影其他貓就靚靚，達仔就成日影到醜醜樣樣。。。

好啦，晏晝得閒，同達仔影下相先。。。

我：喂，達仔，快D比個可愛樣嚟啦
達：收到


達：夠萌未？

咁曳吖嗱