2011年11月26日 星期六

手術後

噚晚,11:30pm過後斷水斷糧;但比佢入房瞓,呢隻野真係幾乖,除左一開始係都要痴住我塊面瞓,其餘時間瞓喺隔離無騷擾我。。。

8:50AM,捉佢入貓袋,發哂爛渣唔肯入,仲比佢個大喇叭刮到我星期四去捉貓媽時比貓媽抓到嘅傷口(各位,捉貓媽行動係失敗左嘅),我鬧阿達仔:走呀,唔聽話吖,唔要你;佢知我嬲,即刻唔敢反抗入袋,hehe~

一去到就有車,仲即開車,我9:30am就去到診所,但我約10:00am,未開門喎



10:00am,放低達仔,佢話4:00pm可以接番佢,咁就返屋企開工啦喂~

11:30am,診所打嚟話手術順利,可以兩點去接佢;吓?兩點?我同佢講要做野,照舊4:00pm去接啦

4:15pm,到診所,醫生遞上樽仔,入面有兩粒大,四粒細肉瘤,擋哂耳道口,之前一定係好辛苦啦;兩日總數$2100


5:15pm,接左唔係好郁嘅達仔返屋企,一返嚟,佢好似唔認得我咁,行嚟行去,仆仆下果隻,又會腳發軟跣左喺度,陰公

6:00pm,跟指示餵佢飲水,佢無嘔,但有打“eat";半個鐘後,餵少量糧佢食,佢即食,但又打"eat",今晚食住少少先啦~

8:30pm,終於識嚟叫我,原來把聲沙哂,問朋友,佢話因為麻醉時插過喉喎

9:00pm,佢又上奇我張床,醫生話佢今日體溫會降低,比你瞓啦



9:10pm,影佢相,比人剃眼眉,剷左青,好型



耳仔入面個傷口唔係好大,好彩~

19 意見:

best actor 提到...

祝達達慢慢康服﹐仲要乖乖聽老豆話﹗

maymay 提到...

冇事就好咯,安樂晒~^_^

匿名 提到...

達仔快啲好返呀!
同埋,快啲生返啲毛毛
靚仔晒~
:)



邪留丸~

Cat 提到...

要否服藥及覆診?

ayclui 提到...

好啦, 捱埋呢刀以後就有好日子過啦~ 達仔加油~
大叔記得比多D 好o野達仔食呀...
P.S. 條頸繩變咗黃色好sharp.

naruto 提到...

best actor:
佢真係聽話架

maymay:
希望幾尾啦

邪小姐:
我都想生返D毛毛呀

catherine:
唔使喎,打左抗生素,唔使口服,醫生幫我諗埋啦

naruto 提到...

ayclui:
食得太多好野啦,要節制下啦

新鮮人 提到...

感人!!

TY 提到...

達仔, good boy boy!! 瞓多幾晚大叔張床, 應該藥到病除!

匿名 提到...

我日日都有睇你個BLOG架..
希望達仔快D冇事..
身體健康;
我開始有D鐘意左'貓' =)

naruto 提到...

新鮮人:
唔係好感人啫

TY:
呢隻野兩晚都主動goodnight kiss 先瞓,好寃氣

匿名:
歡迎光臨,鍾意左貓,咁右貓呢?

ayclui 提到...

goodnight kiss?? 大叔, 其實...達仔係唔係街貓o黎o架??
唔通佢以前係比人養過, 之後又變街貓, 所以咁痴人? 如果唔係, 街貓應該對人好有戒心o架?

meow 提到...

達仔冇事就好啦!兩父子感情深厚,感動!

supageti 提到...

今日正常番晒 啦

naruto 提到...

ayclui:
佢肯定有人養過啦,比人養過嘅貓喺街生存左至少兩年,好叻仔架啦

meow:
個傷口今日都有少量“龍”流出嚟,要睇多幾日先知係咪好番

阿粉:
今日佢係咁瞓,可能麻醉藥未過哂

瘋膏 提到...

小小偒口, 達仔會好快好返, naruto你加油, 好好照顧佢。

naruto 提到...

Go:
佢ok呀,多謝

meow 提到...

陰公啦,達仔。咁可能傷口發炎喎,醫生有冇話要洗傷口同食消炎藥之類呢?

陳娃 提到...

無事就最好啦 :)