好玄﹣同達仔嘅第一次相遇

一路都以為，同達仔嘅緣份始於我經常去嘅一個偏僻地方，如果大家有睇開呢個blog嘅都知，果度有幾隻貓，達仔最叻搶野食，係果度嘅大阿哥。。。



但我噚日執舊相，見到呢張  

我第一次去果個“偏僻地方”係10年11月，而呢張相時間係09年9月，我啱啱搬嚟西環，睇返D相，果日係鬼節，我走左去某公園影相，影到呢隻貓。

從佢眼神，身體比例，坐姿，鼻上面個反光位同耳朵形狀，我好肯定佢係達仔，因為之後我都見過達仔喺呢度出現，佢識行山路過嚟呢度等餵貓阿姐餵食，而捉佢去絕育果個阿姐亦係喺呢度捉佢嘅。。。

但最令我介懷嘅係，佢當時未閹架，未剪耳呢，樣亦都細個D，似啱啱做成貓咁樣咋，如果係咁，可能佢係09年頭出世，而家都未夠5歲～


緣份嘅野果然好奇妙