與達仔結緣

呢篇係舊文，但我諗放番過嚟會統一D，未睇過嘅就當新野睇啦，睇下我同達仔（當時叫黑仔）嘅緣份
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣

又要感性下講下故仔；繼續果竇貓，除左兩隻貓媽，阿女同阿B，仲有一隻剪左耳(即係閹左）嘅貓公


全身黑色，開頭見佢永遠眼超超，但對眼碧綠色，好靚，毛色有光澤(有原因，睇下文）


之後每次去，都會帶貓餅乾或礶頭，佢就開始認得我，而家我人未到，嗌兩聲佢就會飛奔出嚟等我
最近影嘅相明顯見佢眼神唔同左，溫柔左，應該係開始信我啦
而家，食完野佢要“戀”你腳，要你陪佢玩，R背脊，掃佢個頭，仲會開心到喵喵叫，好似同你傾計咁


佢絕頂聰明，食野時，如果同其他貓share一碟，佢識得撥埋個碟近自己；另外，唔係每次去都見到佢，咁佢去左邊呢？結果，一次貓媽同佢失踪，我試下行第二條路去另一個有貓嘅花園，路程要10分鐘，結果，見佢坐左喺度等餵貓阿姐餵佢，即係話佢識跨區搵食
喺果邊即刻唔識我，痴住餵貓阿姐，佢喺呢邊有第二個名。。。烏卒卒
（呢張相當時影架，即刻唔識我，正衰仔）


阿姐餵嘅全部靚野，唔怪之得隻衰野毛色咁靚啦；
佢隻右耳有D疑似爛肉(可能打交），餵貓阿姐比左樽消毒藥水叫我試下幫佢抺，呢隻野除左開頭扭下計之外，竟然乖乖比我清理佢隻耳仔，真係好乖囉，我估以前應該有人養開架

另外，update下貓媽消息。。。

貓媽呢兩日唔見左，我估係“lay"埋生仔啦，已同餵貓阿姐聯絡，知道之後點做，會等佢生完斷左奶先捉佢去閹，應該會係7月中至尾嘅事。。。